దుర్గాసూక్తము - శ్రీవిద్య పరంగా అర్ధము 2వ మంత్రము

 

1.    2. తామ॒గ్నివ॑ర్ణాం॒ తప॑సా జ్వలం॒తీం-వై॑రోచ॒నీం క॑ర్మఫ॒లేషు॒ జుష్టామ్ ।
దు॒ర్గాం దే॒వీగ్ం శర॑ణమ॒హం ప్రప॑ద్యే సు॒తర॑సి తరసే॒ నమః॑ ॥

·         తామ్ = ఆమెను. ఇక్కడ ఆమె అంటే దుర్గాదేవి అని అర్ధం. శ్రీవిద్య పరంగా ఇక్కడ తామ్ అంటే చిదగ్ని. అదే శక్తి.

·         అగ్నివర్ణాం = అగ్ని వంటి తేజస్సు కలది. వెలుగు, పవిత్రత, పాపదహనం, యజ్ఞముఖం, దేవతలకు హవిస్సును చేర్చేది – ఇవన్నీ అగ్ని యొక్క లక్షణాలు. అందుకే ఆమె అగ్ని వర్ణ.

ఇప్పుడు శ్రీవిద్య పరంగా చూస్తే – ఈ అగ్ని బయటది కాదు. చైతన్యాగ్ని. ఈ అగ్ని సాక్షి చైతన్యం. ఈ చైతన్యమే చిత్కలా. చిత్ అంటే సచ్చితానంద రూపమైనది. పరబ్రహ్మ యొక్క కల. ఈ చిత్కలే చైతన్యము. దీని స్వరూపమైనదే పరమేశ్వరి. ఇది కుండలినీ యొక్క ప్రజ్వలిత రూపం. ఆమె మూలాధార చక్రంలో సుషుప్తంగా ఉండి, సాధనతో మేల్కొనబడి సహస్రారంలో పరమశివుడితో ఐక్యం అయ్యే తేజస్సు. శ్రీలలితాసహస్రనామములోని “చిత్కలా” నామము ఇక్కడ గమనించదగినది.

·         తపసాజ్వలంతీమ్ = తపస్సు వల్ల ప్రకాశించేది. వైదికపరంగా తపస్సు అంటే సృష్టికి ముందు పరబ్రహ్మ యొక్క సంకల్పశక్తి.

శ్రీవిద్య పరంగా చూస్తే – ఇక్కడ తపస్సు అంటే నిరంతర ఉపాసన, చైతన్యప్రకాశం. ఉపాసన వలన వ్యక్తమయ్యేది. తపస్సు అనే అగ్నితో మండుతూ వెలుగొందేది. బ్రహ్మే తపస్సు చేసాడని ఉపనిషత్తులు చెబుతాయి. శ్రీవిద్యోపాసన ద్వారా చైతన్యస్వరూపము అనగా ఆత్మసాక్షాత్కారము అనగా స్వరూపనిరూపణము కలుగుతుందని అర్ధము. పంచదశీ, షోడశీ మంత్రముల జపము, శ్రీచక్రార్చనలు తపస్సు అనబడతాయి. ఈ తపః శక్తితో సాధకుని అంతరంగములో దేవి ప్రజ్వలిస్తుంది.

·         వైరోచనీమ్ = వైదికంగా సర్వాన్నీ ప్రకాశింపచేసేది అని అర్ధము. విరోచన అంటే ప్రకాశించడం.

శ్రీవిద్య పరంగా - విరోచనుడు అంటే పరమశివుడు. ఈయనది శివ తత్త్వము, ఆమెది శక్తి తత్త్వము. తురీయ స్వరము ఈ బిందువుతో కూడి విరోచనకు కలపగా వైరోచనీం అవుతున్నాది. అనగా శివశక్తుల ఐక్యత ఇక్కడ కనిపిస్తున్నాది. శ్రీలలితాసహస్రనామములోని “శివశక్తైక్య రూపిణి” నామము ఇక్కడ గమనించదగినది.

·         కర్మఫలేషు జుష్టామ్ = వైదికంగా అన్ని కర్మలకూ తగిన ఫలాన్ని ప్రసాదించేది.

శ్రీవిద్య పరంగా – కర్మఫలాన్ని త్యాగం చెయ్యాలి. త్యాగేనైకే అమృతత్వమానశుః అని వేదం చెబుతుంది. త్యాగం వలన మాత్రమే అమృతత్వాన్ని అనగా మోక్షాన్ని పొందుతారు. శ్రీమాత ధర్మ స్వరూపము. ఆమె ఉనికే కర్మఫల నియమం. ఈ భావన కలిగి సాధన చెయ్యాలి. సాధన ద్వారా వచ్చే ఫలితాన్ని తిరిగి ఆమెకే సమర్పించాలి. ఇదే అమృతానికి సుగమము.

శ్రీచక్రార్చనలో చేసే విరజా హోమము ఇక్కడ స్మరించదగినది.

·         దుర్గాం = దుర్గాలను (కష్టాలను) దాటించేది.

శ్రీవిద్య పరంగా – ఇక్కడ కష్టం అంటే నేను అనే అహంకారం. ఈ అహంకారమే సాధనకు పెద్ద అడ్డంకి/కష్టము. అయితే ఈ అహంకారమనే పెద్ద కష్టాన్ని ఏవిధంగా దాటడం. దానికి తర్వాత సమాధానం చెప్పబడుతున్నాది.

·         దేవీమ్ = ప్రకాశ స్వరూపిణి

శ్రీవిద్య పరంగా – ఆ ప్రకాశ స్వరూపిణి సాధకునిలోనే “నేను ఉన్నాను” అనే ఎరుకను కలిగించే సాక్షిచైతన్యం.

·         శరణమహం ప్రపద్యే = నేను ఆమెను శరణు కోరుతున్నాను.

శ్రీవిద్య పరంగా – శరణాగతిని పొందడం. ప్రకాశస్వరూపిణీ, దేవీ నిన్ను పూర్తిగా శరణుగోరుతున్నాను. అహంకారమనే కష్టమునుండి, అరిషడ్వర్గాలనే కష్టాలనుండి నన్ను కడతేర్చు అని భావము.

ఈ ప్రార్థన సాధనకు హృదయంలాంటిది. నా సాధన మీద నాకు గర్వం లేదు. నీ కృపే నాకు మార్గము అని సాధకుడు ఎల్లప్పుడూ భావనలో ఉండాలి. గురు-మంత్ర-దేవత అనే ఈ మూడు స్తంభాల ద్వారా సాధకుడు శరణు వేడతాడు.

·         సుతరసి = అద్భుతంగా దాటించగలది.

శ్రీవిద్య పరంగా – పై విధంగా సాధన చేయడం వలన ఒక్కో ఆవరణను ఆమె దాటిస్తుంది. సంహారక్రమంలో చేసే శ్రీచక్రపూజలోని ఒక్కో ఆవరణను దాటుకుంటూ వెడితే చివరగా లభ్యమయ్యేది బిందువు. అదే శ్రీమాత ఆవాసస్థానము. అదే సహస్రారము, అమృతమయము. అదే మోక్షస్థానము. సాధకుడును భవసాగరమును దాటించి ఒక్కో మెట్టూ ఎక్కిస్తూ మోక్షమును ప్రసాదించేది. అందుకే శ్రీచక్రార్చన భోగ-మోక్షప్రదాయిని.

·         తరసే నమః = ఆ దాటించే శక్తికి నమస్కారము

శ్రీవిద్య పరంగా – ఈ విధంగా అమృతమును ప్రసాదించే ఆ పరమేశ్వరికి నమస్కారము.

ఈ మంత్రం యొక్క సంపూర్ణ భావము

వైదికంగా – ఓ అగ్ని తేజస్సుతో ప్రకాశించే దుర్గాదేవీ! నీవు సర్వజగత్తునూ ప్రకాశింపచేస్తూ, ప్రతి కర్మకు తగిన ఫలాన్నిస్తున్నావు. నిన్ను శరణుకోరుతున్నాను. నన్ను అన్ని కష్టాలనుండి సులభంగా రక్షించు.

శ్రీవిద్యపరంగా – ఓ చిదగ్ని స్వరూపిణి పరాశక్తీ! నీవే నా బుద్ధికి వెలుగు, నా హృదయానికి శాంతి, నా కర్మలకు ధర్మస్వరూపానివి. నా అహంకారమనే నిజమైన కష్టాన్ని నీ కృపాగ్నిలో కరిగించి గురుకృపతో నన్ను నా స్వరూపమైన పరబిందు చైతన్యానికి చేర్చు.

వైదిక దృష్టిలో ఇది అగ్నిదేవత ద్వారా కష్టాలను దాటించే దుర్గాదేవి మంత్రం. శ్రీవిద్యా దృష్టిలో ఇది పరాశక్తి శ్రీలలితాంబికను, కుండలినీ శక్తిని, శివ-శక్తుల అభేదాన్ని తెలిపే మంత్రం.

ఇంకా ఉంది

దుర్గాసూక్తము - శ్రీవిద్య పరంగా అర్ధము 1వ మంత్రము

శ్రీదుర్గాసూక్తానికి శ్రీవిద్య పరంగా అర్ధమును ఇక్కడ చర్చించబడుతున్నది. ఇందులో శ్రీచక్రోపాసనకు సంబంధించిన రహస్యార్ధాలను కూడా సందర్భానుసారంగా ఇవ్వబడుతున్నాయి. ఇది నా స్వంత రచన కాదు. కొన్ని గ్రంథాలను పరిశీలించి, కొంత సాంకేతిక పరిజ్ఞానాన్ని ఉపయోగించి, శ్రీచక్రోపాసనలో నా అనుభవాన్ని జోడించి ఈ అర్థాలను ఇవ్వబడుతున్నాయి. పాఠకులు గమనించగలరు.

శ్రీమాత్రే నమః

శ్రీమహాగణాధిపతయే నమః

శ్రీ గురుస్సర్వకారణ భూతాశక్తిః

ఓమ్ ॥ జా॒తవే॑దసే సునవామ॒ సోమ॑ మరాతీయ॒తో నిద॑హాతి॒ వేదః॑ । స నః॑ పర్-ష॒దతి॑ దు॒ర్గాణి॒ విశ్వా॑ నా॒వేవ॒ సింధుం॑ దురి॒తాఽత్య॒గ్నిః ॥

·    జాత = జన్మించినది, సృష్టిలో వ్యక్తమైనది. వేద తెలిసినవాడు.

జాతవేద = సృష్టిలో సమస్తాన్ని తెలిసినవాడు.

వైదిక పరంగా జాతవేద అనగా అగ్ని.

అదే శ్రీవిద్య పరంగా, అగ్ని అంటే చిదగ్ని అని రహస్యార్ధము. ఈ చిదగ్ని నుండి ఉద్భవించినదే “చిదగ్నికుండ సంభూతా” – అనగా శ్రీమాత. సమస్తాన్ని తెలిసినది= ఆమె సర్వజ్ఞ. శ్రీలలితారహస్య నామాలలోని “చిదగ్నికుండ సంభూతా” మరియు “సర్వజ్ఞా” నామాలు ఇక్కడ గమనార్హము. పైన మంత్రంలోని జాతవేదయే శ్రీమాత.

·         సునవామ = సమర్పించడం. వైదికంగా సోమరసాన్ని సమర్పించడం. శ్రీవిద్య పరంగా అహంకారం, మనస్సు, కర్మ, వాసనలను, సాధకుడు తనకు తాను పైన చెప్పబడిన చిదగ్నికి సమర్పించడం.

·         సోమమ్ = సోమానికి వైదికంగా అనేక అర్ధాలు ఉన్నాయి. అవి యజ్ఞద్రవ్యం, చంద్రుడు, అమృతం, ఆనందం.

శ్రీవిద్యపరంగా, సోమం అంటే మనస్సు, భక్తి, ఆనందరసం, సహస్రారం నుండి జాలువారే అమృతం అని అర్ధం. అనగా మన అంతరంగాన్ని అమ్మవారికి సమర్పించాలి అని అర్ధము. శ్రీచక్రోపాసనా పరంగా, విశేషార్ఘ్యమే సోమము.

·         అరాతీయతః = అరాతి అంటే శత్రుత్వం. శ్రీవిద్య పరంగా, అది బయటి శత్రువు కాదు. అవి మనలో ఉండే అంతర్గత శత్రువులు – కామ, క్రోధ, లోభ, మోహ, మద, మాత్సర్యములు.

·         నిదహాతి = దహిస్తుంది, కాలుస్తుంది. పైన చెప్పబడిన చిదగ్ని సాధకుని వాసనలను, అంతర్గత శత్రువులను దహిస్తుంది.

·         వేదః = సర్వజ్ఞడు. మన అంతరంగాన్ని పూర్తిగా తెలిసిన దేవి – అదే చైతన్యం.

·         సః నః పర్షత్ – ఆమె మమ్మల్ని దాటించాలి.

వేటిని దాటించాలి?

·         అతి దుర్గాణి = సాధారణంగా దుర్గములు అంటే కష్టాలు. కష్టాలను దాటించాలి.

శ్రీవిద్య పరంగా మూడు దుర్గాలు ఉన్నాయి. అవే మూడు మలాలు. అవి 1. ఆణవమలం = నేను చిన్నవాడిని అనే భావం. మరొక అర్ధం - బ్రహ్మనీ, ఆత్మ జ్ఞానాన్నీ తెలుసుకొనకుండా అడ్డుపడే అహంకారం. 2. మాయికామలం = భేదదృష్టి. పరతత్త్వ జ్ఞానవాసన నెప్పుడును కలుగనీయనిది. 3. కార్మికమలం = కర్మబంధము. గురువు బోధించిన పరమార్థమున బుద్ధి చొరనీయనిది. ఈ మలాలను వదలించుకోవడం చాలా కష్టమైనది. ఈ మలములను శుద్ధి పరచే క్రియయే శ్రీచక్రోపాసనలో చేసే తత్త్వశోధన..

విశ్వా = అన్నీ, ఒక్కటి కాదు. అన్ని దుర్గములను దాటించవేయుట

·         నావేవ = పడవ. ఈ పడవ ఏమిటి? శ్రీవిద్య పరంగా ఈ పడవే గురువు, గురుకృప, గురుమంత్రము. పడవ లేకపోతే సముద్రాన్ని ఏవిధంగా దాటలేమో అదేవిధంగా గురువు లేకుండా ఏ ఉపాసనకూడా సఫలమవదు.

·         సింధుం = సముద్రము. శ్రీవిద్య పరంగా అదే సంసారము.

·         దురితాత్ = పాపము, అజ్ఙానము, కర్మ, వాసనలు.

·         అగ్నిః = అగ్ని. ఈ మంత్రం అగ్నితో మొదలై అగ్నితో ముగుస్తుంది. శ్రీవిద్య ప్రకారం ఇక్కడ రహస్యం ఏమిటంటే, సాధకుడు అగ్ని నుండే ప్రయాణం మొదలుపెడతాడు. అగ్నిలోనే లీనమవుతాడు. అంటే చిదగ్ని నుండే ఉద్భవించి, చిదగ్నిలోనే లీనమవుతాడు.

ఈ మంత్రం యొక్క సంపూర్ణ భావము

ఓ చిదగ్ని స్వరూపిణి శ్రీమాతా! నా అహంకారం, వాసనలు, కర్మబంధాలు అన్నింటినీ నీ జ్ఞానాగ్నికి సమర్పిస్తున్నాను. గురుకృప అనే పడవ ద్వారా నన్ను సంసార సాగరం నుండి దాటించి, నా నిజస్వరూపాన్ని (ఆత్మ సాక్షాత్కారాన్ని) అనుభవించేలా అనుగ్రహించు.

శ్రీలలితాసహస్రనామ స్తోత్రం కూడా ప్రధానంగా చిదగ్నికుండసంభూతా అన్న నామంతోనూ, దుర్గాసూక్తం కూడా అగ్నితోనే ప్రారంభవుతున్నాయి. ఈ విధంగా కూడా ఈ రెండింటికీ సమన్వయం గమనించవచ్చును.

ఇంకా ఉంది

తంత్రోపకరణ స్తోత్రము

శ్రీ త్రిపురసుందరీ దేవి తంత్రోపకరణ స్తోత్రము

శ్రీచక్రాన్ని ఈ సాధనకు హృదయంగా భావిస్తారు. శ్రీ త్రిపురసుందరిని స్వయంగా శ్రీచక్ర అధిష్టాత్రీ దేవిగా కొలుస్తారు. తంత్రోపకరణ స్తోత్రంలో సాధకుడిని బాహ్య పూజల నుండి ముందుకు తీసుకెళ్లి.. అంతర్గత సాధన, కుండలినీ జాగరణ, చైతన్య శక్తి మరియు అద్వైత భావం వైపు నడిపించే సూచనలు కనిపిస్తాయి.

అస్య శ్రీత్రిపురసుందరి తంత్రోపకరణ స్తోత్రస్య భగవాన్ దక్షిణామూర్తి ఋషిః। అనుష్టుప్ ఛందః। శ్రీమహాత్రిపురసుందరి దేవతా। శ్రీవిద్యాసిద్ధ్యర్థే జపే వినియోగః॥

 

​ధ్యానమ్॥......

​బాలార్కమండలాభాసాం చతుర్బాహుం త్రిలోచనామ్।

పాశాంకుశధనుర్బాణధారిణీం శివవల్లభామ్॥

​సిందూరారుణవిగ్రహాం త్రినయనాం మాణిక్యమౌలిస్ఫురత్।

తారానాయకశేఖరాం స్మితముఖీమాపీనవక్షోరుహామ్॥

పాణిభ్యామలిపూర్ణరత్నచషకం రక్తోత్పలం బిభ్రతీమ్।

సౌమ్యాం రత్నఘటస్థితరక్తచరణాం ధ్యాయేత్పరామంబికామ్॥

 

​స్తోత్రమ్॥......

​అతి గుహ్యతీ గుహ్య దుర్లభతమ మహేశ్వరి।

తవ తంత్రోపకరణం కథయామి వరాననే॥

​శ్రీచక్రం పరమం దివ్యం సర్వతంత్రేషు గోపితమ్।

యస్య స్మరణమాత్రేణ సర్వసిద్ధిః ప్రజాయతే॥

​పాశోఽయం రాగసంయుక్తోఽ౦కుశః క్రోధనాశనః।

ఇక్షుకోదండమాయుక్తాః పంచబాణా మనోహరాః॥

​ఏతే తవ మహాదేవి తంత్రోపకరణాః శుభాః।

యైః సాధకః సదాऽనందం పరమం పదమశ్నుతే॥

​కులాచారప్రియా దేవి కులమార్గప్రదాయిని।

కులకుండలినీ రూపే కులజ్ఞానప్రకాశిని॥

​శ్రీవిద్య పరమాగుహ్యా సర్వమంత్రేషు దుర్లభా।

యస్యాః ప్రసాదమాత్రేణ మోక్షలక్ష్మీః ప్రజాయతే॥

​నమస్తే పరమేశాని నమస్తే కరుణామయే।

నమస్తే దేవదేవేశి త్రిపురే పరమేశ్వరి॥

 

​ఫలశ్రుతిః॥

​యః పఠేత్ ప్రాతరుత్థాయ శ్రద్ధాభక్తిసమన్వితః।

తస్య సిద్ధిర్భవేద్దేవి సర్వకామార్థసాధిని॥

​భూతప్రేతపిశాచాద్యా నశ్యంతి స్మరణాదపి।

లభతే పరమాం విద్యాం శ్రీవిద్యాం మోక్షదాయిణీమ్॥

​ఇతి శ్రీత్రిపురసుందరి తంత్రోపకరణ స్తోత్రం సంపూర్ణమ్॥

ఈ స్తోత్రం శ్రీవిద్యా సాధనలో అత్యంత గూఢమైనదిగా పరిగణించబడుతుంది. సాంప్రదాయం ప్రకారం దీని ఉన్నత స్థాయి సాధనలు సద్గురువు మార్గదర్శకత్వంలోనే చేయాలి.

​ఈ స్తోత్రం పారాయణం ముఖ్యంగా క్రింది సాధనలలో ఉపయోగకరంగా పరిగణించబడుతుంది:

​దేవి కృప మరియు సౌభాగ్య ప్రాప్తి

​శ్రీవిద్యా ఉపాసనా సిద్ధి

​ఆత్మిక తేజస్సు మరియు ఆకర్షణ శక్తి

​భయం, ప్రతికూల శక్తి (నెగటివిటీ) మరియు తాంత్రిక బాధల (అడ్డంకుల) నుండి రక్షణ

​ధ్యానం మరియు మంత్ర సిద్ధిలో పురోగతి

​కుండలినీ చేతనా జాగరణ

​ఆధ్యాత్మిక వైభవం మరియు అంతర్‌జ్ఞాన వృద్ధి

​లలితా మహాత్రిపురసుందరిని “షోడశి”, “రాజరాజేశ్వరి”, “లలితాంబికా” మరియు “శ్రీమాతా” అనే పేర్లతో కూడా పిలుస్తారు. శ్రీవిద్యా సాంప్రదాయంలో ఈమెను బ్రహ్మాండం యొక్క పరమ చైతన్యంగా మరియు సౌందర్యానికి అత్యున్నత శక్తిగా భావిస్తారు.

 

​ఈ స్తోత్రాన్ని సామాన్య వ్యక్తులు కూడా శ్రద్ధతో పఠించవచ్చు, కానీ దీని గూఢ తాంత్రిక సాధనలు మాత్రం ఎల్లప్పుడూ గురువు మార్గదర్శకత్వంలోనే చేయాలి. శ్రీవిద్యా సాంప్రదాయంలో దీక్ష లేకుండా లోతైన ప్రయోగాలు చేయవద్దని సలహా ఇస్తారు, ఎందుకంటే ఇది అత్యంత శక్తివంతమైన సాధనగా పరిగణించబడుతుంది.

​పూర్ణ శ్రద్ధ, పవిత్రత మరియు నియమ నిబంధనలతో లలితాంబికను ఉపాసించే సాధకుడి జీవితంలో ఆధ్యాత్మిక ఉన్నతి, సౌభాగ్యం, మానసిక ప్రశాంతత మరియు దైవిక రక్షణ లభిస్తాయని నమ్ముతారు.

శ్రీపరాభావ నామ సంవత్సరములో (2026-27) శక్తి పర్వదినములు

 

 

పర్వదినము	తిథి	ఈ సంవత్సరము తేది
శ్రీ దేవీ వసంత నవరాత్రులు	చైత్ర శుద్ధ పాడ్యమి నుండి చైత్ర శుద్ధ నవమి వరకు	19.03.2026 నుండి 27.03.2026 వరకు
శ్రీ తారా జయంతి	చైత్రశుద్ధ నవమి (శ్రీరామ నవమి)	27.03.2026
శ్రీ మాతంగీ జయంతి	వైశాఖ శుద్ధ తదియ	20.04.2026
శ్రీ బగళాముఖి జయంతి	వైశాఖ శుద్ధ చతుర్ధి	21.04.2026
శ్రీ ఛిన్నమస్త జయంతి	వైశాఖ పౌర్ణమి	01.05.2026
శ్రీ ధూమావతి జయంతి	జ్యేష్ఠ శుద్ధ చతుర్ధి	18.06.2026
శ్రీ వారాహీ నవరాత్రులు	ఆషాఢ శుద్ధ పాడ్యమి నుండి ఆషాఢ శుద్ధ నవమి వరకు	15.07.2026 23.07.2026 వరకు
శ్రీ గురుపూర్ణిమ	ఆషాఢ పౌర్ణమి	29.07.2026
శ్రీ భువనేశ్వరి జయంతి	భాద్రపద శుద్ధ ద్వాదశి	23.09.2026
శ్రీ కాళీ జయంతి	భాద్రపద కృష్ణ అష్టమి (అర్ధరాత్రి)	04.10.2024
శ్రీ దేవీ శరన్నవరాత్రులు	ఆశ్వీయుజ శుద్ధ పాడ్యమి నుండి ఆశ్వీయుజ శుద్ధ నవమి వరకు	11.10.2026 నుండి 20.10.2026వరకు
శ్రీ కమల జయంతి	ఆశ్వీయుజ అమావస్య (దీపావళి అమావాస్య)	09.11.2026
శ్రీ త్రిపురభైరవి జయంతి	మార్గశిర పౌర్ణమి	24.12.2026
శ్రీ శ్యామలా (మాతంగి) నవరాత్రులు	మాఘ శుద్ధ పాడ్యమి నుండి మాఘ శుద్ధ నవమి వరకు	07.02.2027 నుండి 15.02.2027
శ్రీ లలిత (షోడశి) జయంతి	మాఘ పౌర్ణమి	20.02.2027

 

పైవి గాక, శ్రీగురువుల జన్మదినము, సాధకుని జన్మదినము, సాధకుని దీక్షా దినములు కూడా అత్యంత పూజనీయములు. అనగా ఆయా రోజులలో విశేష పూజలు చెయ్యాలి అని భావము.

దశ మహావిద్యల జయంతి పర్వదినములు సంప్రదాయములను బట్టి మారవచ్చును. గమనించగలరు.